موقع لتحويل اي صورة الى باترون تطريز , كيفية الحصول على باترون التطريز لأي صورة لديكم

لمحبي التطريز بقطبة الإكس – أو الغرزة المعدودة – و اللي بيحبوا يحولوا أي صورة
أو تصميم عندهم لباترونة/ باترون، مع دليل الألوان للخيوط

لقينا موقع بسيط سهل بيقوم بعملية التحويل هاي…رح تحتاجوا بس الصورة اللي بدكم ياها، تحملوها
للموقع و تحددوا شوية خيارات اللي بتحدد قطعة شغلكم، من نوع الخيوط و مساحة الشغل
اللي بدكم تشتغلوها و بس….بتضغطوا على كبسة و بيصير عندكم أكتر من اختيار للتنزيل حسب
رغبتكم…رح نورجيكم بالخطوات إن شاء الله عشان نسهل عليكم

بس نخلّي شغلة أساسية ببالنا: الموقع موجود على شبكة الإنترنت، ف ضروري نتزكر ما نحمّل
أي صور بنعتبرها شخصية أو صور ما بدنا حدنا غريب يشوفها. سياسة الخصوصية للموقع بتنص
على إنه الصور المحمّلة يتم محيها متى ما فصل المستخدم الإتصال مع الموقع (لكن يتم
الإحتفاظ بمعلومات عنوان الآي بي و هيك لأغراض الإحصاءات)، لكن للإطمئنان و الحفاظ عالخصوصية الأفضل
ما نحمّل أي صور متل ما قلنا بنعتبرها شخصية أو ما شابه

و شغلة تانية هي كل ما زادت تفاصيل الصورة و دقتها، كل ما كان الباترون
بيحتوي على عدد أكبر من الألوان/ الخيوط المستخدمة.

و كل ما لازم يزيد حجم مساحة العمل أو مساحة التطريز لإبراز التفاصيل هاي بشكل
أوضح

الخطوة الأولى – بنفوت عالموقع اللي هو
عنا الكلام المكتوب بيعطي فكرة عن الموقع و شو بيعمل و معلومات بسيطة.

ممكن تخزين الباترون/الباترونة على كمبيوتركم عند الإنتهاء ع شكل ملف بي دي إف لتطبعوه أو
يضله عندكم دون العودة للموقع كل مرة. رح تلاحظوا عالشمال في مجموعة من اللغات اللي
بيشتغل عليها الموقع، للاسف العربية مش منها

في المكان المخصص، بنقوم بتحميل الصورة اللي بدنا ياها، و بعدين – نكست أو التالي،
لنروح عالخطوة التانية

الخطوة التانية – تحديد الإختيارات و الخصائص
رح تلاقوا صفحة الخطوة التانية هيك، مجموعة من الخيارات مع الصورة اللي اخترتوها. مع نظرة
مقربة للخيارات رح تلاقوا

أشهر الأنواع و متوفرة محليا هي ال دي إم سي، هاد بالنسبة للخيار الأول اللي
بيخليكم تختاروا نوع أو ماركة الخيوط لتحديد الألوان و أرقامها و درجاتها، أمّا بالنسبة للخيار
التاني، فهو بيحدد عدد القطب أو الغرز لكل إنش أو سم.

هاد بيحدده نوع القماش اللي عم تشتغلوا عليه، مثلا الإيتامين بنقدر نستعمل ال 14 غرزة
لكل إنش، تقريبا 5.5 غرزة لكل سم.

أمّا الخيار الأخير فهو لمساحة الشغل الكاملة اللي بدكم التصميم يغطيها (رح نتغلب هون شوي
بالتحويل من إنش إلى سم، لكن عمو جوجل عنده الحل فالأمور إن شاء الله سهلة).

الموقع أتوماتيكي بيحسب المساحات اللي ممكن يغطيها التصميم اللي تم تحميله و بيعطيكم عدة اقتراحات
حسب الملف أو التصميم ف إنتوا بتختاروا الأنسب لالكم، و فيكم تغيروا الخيارات ع قد
ما بدكم حتى توصلوا النتيجة اللي بدكم ياه

بعد ما حددنا كل الخيارات و الخصائص بيصير دور الخطوة التالتة

الخطوة التالتة – اختيار الباترونة/الباترون المناسب
هون الموقع أوجدلكم الباترون/ الباترونة، اللي عليكم هو تختروا من مجموعة الملفات الموجودة. رح تبلش
الملفات – بالصور- بأكتر واحد فيه ألوان خيوط، بعدين بيصير تدريجيا يقلل الالوان المستعملة بالتصميم
أو الباترون كل ما نزلنا بالخيارات لتحت. ما عليكم غير تختاروا الصورة اللي بتناسب ذوقكم
أكتر إشي, و تضغطوا عليها لتحميل الباترون.

بس هاد هو المطلوب
هاد أول ملف للتحميل بأكبر عدد من الألوان

و هاد آخر ملف للتحميل بأقل عدد من الألوان

و هاي دليل الألوان بالأرقام اللي بيوفرها الملف بس تنزلوه من الموقع
هاد دليل الملف الأول بأكبر عدد من الألوان…..دقة عالية بتحديد الألوان

ممكن كمان نستخدم هاد الموقع للتصماميم البسيطة و الكلمات

مشكلة هاد الموقع تكمن بعد القدرة على تحديد عدد الألوان المستخدمة. لكن متل ما قلنا
بيعطينا عدة إختيارات ف من الممكن نتجاوز هاي المشكلة بشكل ما. طيب ليش هاد الموقع
مش غيره؟ نعم متوفر غيره من المواقع الكتيرة اللي فيها خيارات أكتر و تعديلات أكتر،
لكن المواقع التانية ممكن تطلب منكم تدفعوا مبلغ معيّن مقابل تعديلات معينة أو بعد ما
تعملوا الباترون و تشتغلوا ما تقدروا تنزلوه (بيكون الوصول للباترون فقط من خلال الموقع دون
القدرة علي تنزليه) و إزا ما في نت عندكم ما رح توصلوا للباترون، و في
مواقع بتتطلب التسجيل من خلال الأيميل و خطوات زيادة كتير دون الوصول لباترون ذو جودة
عالية

الموقع اللي حكينا عنه، مجاني و بيمنحنا مجموعة كبيرة من الملفات القابلة للتنزيل مع دليل
الألوان و الخيوط دون أي مشاكل.

إزا حابين إشي يعطيكم تحكم أكتر بالتصميم و الباترون، مع التحكم بالألوان و القماش و
خصائصه، في برنامج رائع إسمه
PCStitch

هاد البرنامج خرااااافي، لكن مشكلته إنه غير مجاني (لكن في فترة تجربة مجانية، لكن أكيد
مش كل الخصائص مفعلة فيها). البرنامج بيكلف تقريبا 50 دولار, و بنصح فيه أي حدا
متخصص بالتطريز بغرزة الإكس. و هاي لينك البرنامج إزا حبيتوا تجربوه أو تاخدوا فكرة عنه

http://www.pcstitch.com/

و يعطيكم العافية، و لا تنسوا تشاركونا أي عمل تطريز بتعملوه باستخدام الباترونات اللي حصلتوا
عليها باستخدام الموقع أو أي أعمال تانية بتحبوا تورجونا ياها

موقع لتحويل اي صورة الى باترون تطريز

كيفية الحصول على باترون التطريز لأي صورة لديكم

مواقع لتحويلات اي صور الى باترونات تطريزات