اسعار الخيوط الكل ادخلو وشاركو , ادخلى اعرفى لسعار الخيوط وكل مايخص الخياطه هتلاقى هنا

اسعار الخيوط

الاميجرومى هو فن صناعه الدُمى أو المجسمات بالكروشيه .
عشان اعمل مجسم أو عروسه بحتاج الادوات دى
(خيط ، وابره كروشيه مناسبة لسمك الخيط ، ابره تنضيف اللى هى ابره الكنفاه او
ممكن ابره المنجد ، فايبر ، سلك ، غطاء علبه سمن بلاستيك ، ورق جوخ
، لزق اوهو ، عيون سيفتى او زراير ، الماركر)

اولا : الخيط / الخيوط انواع كتير جدا وبتفرق فى جوده وتقفيل المجسم افضلها الخيوط
التركى لانها ثابته الالوان مع الغسيل ومريحه وسلسه فى الشغل بعكس الخيوط المصري للاسف بتبهت
ومش دايما سماكه الخيط واحده وكتير منها خشن وبيبقى مرهق فى الشغل وبيدى نتيجه مش
حلوه .

الخيوط التركى بردو انواع فيه منها القطن وفى منها الصوف وفيه منها الاكريلك يعنى خيوط
مصنعه ودى انسب خيوط للاميجرومى لان بعض الاطفال بيكون عندها حساسيه للصوف والقطن بيكون مطفى
وبيرخى مع الوقت ، من الخيوط الاكريلك اللى بتدى نتيجه كويسه فى الشغل واغلب اللى
شغال اميجرومى بيستخدمها

1- اليز ديفا (رفيع شويه) ودا اكتر خيط انا بفضله وبشتغل بيه واغلب الشغل اللى
على الصفحه معمول بيه سعر الشله بيتراوح من 20 الى 25 جنيه
2- روما ( دا نفس الديفا بالظبط وبديل عنه بس مشكلته قليل شويه ومش دايما
متداول والورقه اللى عليه بياناتها مش دايما مظبوطه فممكن متعرفيش تجيبي نفس اللون تانى غير
بالنظر عشان كدا ارخص من الديفا سعر الشله 15 جنيه .

3- ناكو ابيزا ( اتخن حاجه بسيطه من اليز ديفا ) وكويس بردو وماركه نضيفه
ممكن ببياناتته اللى على الورقه تقدرى تجبيه تانى بسهوله سعر الشله 19 جنيه تقريبا .

4- ناكو برلنتا (متوسط السُمك) سعر الشله بيتراوح بين 24 ل27 جنيه .

3- كوتن جولد (سميك الى حد ما) سعر الشله بيتراوح بين 27 ل 30 جنيه
.

فى انواع تانيه طبعا وحسب كل واحد بيرتاح فى انهى خيط المهم يكون اكريلك وتركى
لضمان نتيجه كويسه .
ثانيا : ابر الكروشيه المناسبه لسمك الخيط / اى خيط هتجيبيه هتلاقى عليه ورقه الورقه
دى مهمه جدا يستحسن تحتفظى بيها .. لييييييه ؟
لان الورقه دى بيبقى عليها بيانات مهمه اهمها الرقم الكودى للون الخيط لو مثلا البكره
خلصت ومحتاجه تانى نفس الدرجه بتشوفى رقم اللون وبتقدرى تلقيه بسهوله ، مكتوب عليها كمان
اقتراح لرقم الابره المناسبه لسمك الخيط دا ، بس الاميجرومى دايما بنشتغله برقم ابره اقل
من الاقتراح اللى على الورقه .

نخلى بالنا الابر انواع ( استنلس ، الومنيوم ، سيلكون ، خشب ) النوع اللى
يريحك اشتغلى بيه اهم حاجه يكون مقاس الابره (1.50 أو 1.75 أو 2) مللى بعض
الابر بيبقى مكتوب عليها رقم بس مش مكتوب عليها المقاس بالمللى ودا هتلقوه شائع اكتر
فى الابر الاستانلس الصغيره اللى لونها فضي فدى نشتغل بابره رقم 2 بتكون مناسبه

ثالثا : ابره التنضيف او الكنفاه او المنجد
دى بنحتاجها فى التطريز وتقفيل الشغل بتاعنا مش لازم تتقيدى بحاجه معينه اسهل حاجه بنسبالك
هاتيها انا شخصيا بستخدم المنجد لان سنها مدبب وبقفل وبطرز بيها بعكس الكنفاه ملهاش سن
فمهمتها تقفيل الشغل فقط ومش بتنفع للتطريز .
رابعا : الفايبر .
اللى هو بيكون موجود فى المخدات وبيتباع عند اى منجد بالكيس وزن الكيس كيلو ب40
جنيه تقريبا يستحسن نجيب الخشن مش السوفت والكيس بيقعد فتره كبيره جدااا لان حجمه كبير
.

خامسا : السلك :
السلك دا بنحطه فى بعض العرائس او الشخصيات عشان تخليها تتحرك هو انواع بردو افضلها
السلك المجلفن او سلك الكهرباء النحاس المغلف او سلك الاكسسوارت النحاس بردو عشان لما العروسه
تتغسل مايصديش ومقاس السلك 2 او 3 مللى . ونقول كمان بعض العرائس مش كلها
فى شخصيات كتير مش بنحطلها عادى جدا .

سادسا : غطاء علبه سمن بلاستيك
بنقص الغطاء على أد قدم العروسه عشان يديها ثبات ويساعدها انها تقف ممكن بدل غطاء
علبه السمن نستخدم جلد الكشكول السلك بتاع المحاضرات دول اسهل ادوات متوفره عند الجميع .

سابعا : ورق الجوخ ولزق الاوهو:
دا نوع ورق شبه القماش بنسخدمه احيانا كبديل لعيون العرايس وممكن يتزين بيه الشغل فى
العرايس ويتعمل بيه جيوب مثلا بيتباع بالمتر او بالفرخ فى المكتبات او محلات الخيوط او
فى كتير جدا منه فى درب البرابره فى العتبه بيتقص وبتلزق بلزق اسمه اوهو دا
لزق كويس جداا وبيخلى الحاجه ثابته على الخيوط او القماش بعكس انواع اللزق التانيه .

ثامنا : العيون السيفتى او الزراير :
دى عيون شبه الزارير النص لولى بس ليها بريمه زى المسمار وبتستخدم كبديل للتطريز هى
للاسف مش موجوده فى اماكن كتير والاغلب بيتباع اون لاين بس ممكن نستخدم الزارير بدل
منها او الجوخ زى ماقولنا

تاسعا : الماركر :
دى عباره عن علامات بنسخدمها عشان نعلم بدايه كل دور فى الشغل ومش لازم نستخدم
الماركر البلاستيك ممكن نستخدم دبوس المكتب او دبوس الهدوم اللى على شكل كروس او بنسه
الشعر او ممكن نعلم بخيط بلون مختلف .

جميع الادوات اللى فاتت هنلاقيها متوفره فى محلات الخيوط معادا اللزق الاوهو موجود فى المكتبات
، وافضل محلات اتعاملت معاها موجوده فى الازهر المحل موجود فى كل الادوات واسعار ممتازه
ومعامله محترمه

1- محل الحاج احمد عبد الراضي دا موجود فى حاره الصناديقه ( اول حاره فى
شارع المعز لدين الله الفاطمى) من ناحيه الازهر وعندهم شحن محافظات .
2- محل الاشراف ( امام رجب العطار القديم فى شارع الازهر )
3- محل بينه وبين محل الاشراف محلين الحقيقه مش متذكره اسمه بس موجود فيه خيوط
روما البديل الارخص لاليز ديفا
فى محلات تانيه طبعا بس دول ارخص فى الاسعار وتقريبا عندهم كل حاجه وخصوصا المحل
الاول
ملحوظه مهمه احنا فى شتاء لذلك الخيوط اللى ذكرناها مش كل الوانها متوافره لان الاهتمام
اكتر بالخيوط الصوف .
دى كل الادوات بالتفصيل واى عمل اميجرومى بنستخدم فيه جزء من الادوات دى مش شرط
كلها نيجي بقى للشرح نفسه :
** عشان تعملى مجسم او عروسه لازم تتقنى بعض غرز الكروشيه الاول ، طبعا غرز
الكروشيه كتير جداااااا بس الميزه فى الاميجرومى ان قائم على كام غرزة اساسيه بس ونخلى
بالنا من اسماء الغرز بالانجليش والاختصار المكتوب بتاعها اللى هيتقال فى الفديوهات الجايه .

كدا جبنا كل الادوات واتعلمنا الغرز كويس بس بردو مش عارفين نعمل عروسه او دبدوب
ازاى؟؟
بصي ياستى فى حاجه اسمها باترون : الباترون دى يعني الخطوات اللى بمشي عليها عشان
اعمل العروسه او الشكل اللى انا عايزاه ، طبعا انا فى البدايه مبيبقاش عندى قدره
ان اصمم باترون خاص بيا عشان كدا بنمشي على باترون جاهز او بنتبع فيديو ونعمل
زيه مع الوقت ومع الممارسه بعض الناس بيكون عندها القدره تغير فى الباترون او تصمم
باترون بتاعها هى .
طيب الباترونات دى اجيبها منين ؟؟؟
الباترونات دى موجوده على كذا موقع فيه مجانى وفيه بفلوس فيه صفحه على الفيس بتجمع
بعض الباترونات المجانيه اللى بتنزل على المواقع دى

اسعار الخيوط الكل ادخلو وشاركو

ادخلى اعرفى لسعار الخيوط وكل مايخص الخياطه هتلاقى هنا

سعر الخيط الكل ادخلى وشاركى